Types of Takbir: Eid al-Adha and Eid al-Fitrதக்பீரின் வகைகள்: ஹஜ் பெருநாள் மற்றும் நோன்புப் பெருநாள்

ஹஜ் பெருநாளில் இரண்டு வகையான தக்பீர்கள் உள்ளன:

• தக்பீர் முத்லக் (பொதுவான தக்பீர்): துல் ஹிஜ்ஜா மாதம் முதல் பிறையிலிருந்து, அய்யாமுத் தஷ்ரீக் உடைய கடைசி நாளின் (துல் ஹிஜ்ஜா 13) சூரிய அஸ்தமனம் வரை எந்நேரமும் சொல்லலாம்.

• தக்பீர் முகய்யத் (குறிப்பிட்ட தக்பீர்): இது அரஃபா தினத்தின் (துல் ஹிஜ்ஜா 9) ஃபஜ்ர் தொழுகையிலிருந்து தொடங்கி, அய்யாமுத் தஷ்ரீக் உடைய கடைசி நாளின் (துல் ஹிஜ்ஜா 13) அஸர் தொழுகை வரை ஒவ்வொரு கடமையான தொழுகைக்குப் பின்னரும் சொல்லப்பட வேண்டும்.

நோன்புப் பெருநாளைப் பொறுத்தவரை தக்பீர் முகய்யத் (தொழுகைக்குப் பின் சொல்லும் முறை) என்பது கிடையாது.

• நோன்புப் பெருநாளில் ‘தக்பீர் முத்லக்’ மட்டுமே மார்க்கமாக்கப்பட்டுள்ளது.

• அதாவது, ரமதான் மாதத்தின் கடைசி நாள் சூரிய அஸ்தமனம் ஆனது முதல் பெருநாள் தொழுகை முடியும் வரை வீதியிலும், வீட்டிலும், சந்தையிலும் என எந்நேரமும் தக்பீர் சொல்லலாம்.

தொழுகைக்குப் பின்னால் சொல்லப்படும் ‘தக்பீர் முகய்யத்’ என்பது நோன்புப் பெருநாளிற்குக் கிடையாது என்பதில் நான்கு மத்ஹபுடைய அறிஞர்களும் ஏகோபித்த கருத்தில் (இத்திஃபாக்) உள்ளனர். ஏனெனில் அது ஹஜ்ஜு பெருநாளுக்கானதாகும்.

நோன்பு பெருநாளினுடைய தக்பீர் என்பது ‘தக்பீர் முத்லக்’ (பொதுவான தக்பீர்) ஆகும். இதில் ‘தக்பீர் முகய்யத்’ (குறிப்பிட்ட நேரத்தோடு பிணைக்கப்பட்ட தக்பீர்) என்பது இல்லை.

அதாவது, தக்பீர் கூறத் தொடங்கும் நேரத்திலிருந்து அது முடியும் வரை காலை மற்றும் மாலை என எல்லா நேரங்களிலும் நீங்கள் தக்பீர் கூறலாம்; அது எதனோடும் கட்டுப்படுத்தப்படவில்லை.

இது ஈதுல் பித்ருடைய இரவின் (பெருநாள் இரவு) சூரிய அஸ்தமனத்திலிருந்து தொடங்குகிறது. ரமதானின் கடைசி நாளின் சூரியன் அஸ்தமித்துவிட்டால், அதன் பிறகு நீங்கள் தக்பீர் கூறுவது மார்க்கமாக்கப்பட்டுள்ளது.

அதன் முடிவு நேரத்தைப் பொறுத்தவரை, அது பெருநாள் தொழுகை நிறைவடைவதோடு முடிவடைகிறது.

(ரமதானின் கடைசி நாளின்) சூரிய அஸ்தமனத்துடன் அந்த எண்ணிக்கை பூர்த்தியடைகிறது. இதன் காரணமாகவே, ஒரு பெண் பெருநாள் தொழுகைக்குச் செல்லாவிட்டாலும், இமாம் தொழுகையை முடிக்கும் வரை அவர் தக்பீர் கூறுவது மார்க்கமாக்கப்பட்டுள்ளது. அவர்கள் தொழுகையை முடித்துவிட்டால், தக்பீருடைய நேரம் முடிவடைந்து விடுகிறது.

தக்பீருடைய வாசகங்கள் தொடர்பாக நபி ﷺ அவர்களிடமிருந்து ஒரு குறிப்பிட்ட ஒரு வடிவம் ஆதாரப்பூர்வமாக நிலைபெறவில்லை.

மாறாக, ஸஹாபாக்கள் (ரதியல்லாஹு அன்ஹும்) அவர்களிடமிருந்தே இது ஆதாரப்பூர்வமாக வந்துள்ளது. தக்பீரை இரட்டைபடையிலோ அல்லது ஒற்றைபடையிலோ சொல்லலாம், அதில் தவறில்லை. அறிஞர்களிடத்தில் அவை இரண்டும் சரியானதும், அறியப்பட்டதாகவும் உள்ளன.

இதில் உள்ள அடிப்படை விதி என்னவென்றால், வணக்க வழிபாடுகளின் அனைத்து முறைகளும் – அவை சொல்லாகவோ அல்லது செயலாகவோ இருக்கட்டும் – ஸஹாபாக்கள் (ரதியல்லாஹு அன்ஹும்) அவர்களிடமிருந்து ஆதாரப்பூர்வமாக அறிவிக்கப்பட்டு இருந்தால், இதையோ அல்லது அதையோ என எதனை செய்வதில் தவறில்லை.